Никия же бо иныя книги тако Бога славят, якоже Псалтирь душеполезна есть: ово Бога славит со Ангелы вкупе, и превозносит, и воспевает велиим гласом, и Ангелы подражает: овогда бесы кленет и прогоняет, и велик плач и язвы творит: за цари и князи, и за весь мир Бога молит. Псалтирию и о себе самом Бога умолиши: больше бо и выше есть всех книг. Сия убо нарицаемая Псалтирь подобна есть великому морю: от моря бо не оскудевает вода никогдаже, ни умаляется изливанием рек и источник, тако и от Псалтири не оскудевает пение никогдаже. Псалтирь бо наречеся доблесть и дерзость к Богу о спасении души: велика бо мзда в посте и поклонех и прочитании Псалтирнем.

Аще ли брате, речеши, яко немощен есмь, и не могу правила сего совершити, зане плоть есмь: воззри на воздух, и виждь, како солнце и луна и звезды, день и нощь не почивают ходяще путем своим, заповеди Господни творят. И яко оно огненное сотворение не яст, ни пиет, ни муки чает будущия, а Бога боится, и повеления Его не престая творит. Ты же, брате, аще и плоть еси, но тело твое покровенно имаши, елика ти до избытка яси и пиеши, и спиши довольно. Суть бо инии в полунощи восстающе и покланяющеся, и молящеся Богу, и рукоделию прилежат, а Творца своего благодарят о всем. И паки глаголет: коль слабо естество водное и немощно есть, а Бога боится, день и нощь не престает напаяющи, и текущи, не токмо человеки но черность их омывает, скоты, птицы и звери, гады вся напаяет, и на земли изливает. И ты, брате, како себе не рассмотряеши, ни себе внимаеши: вся возможна от Бога, а от человек ничтоже, токмо мужайся и крепися, и Бог поможет ти. Глаголет бо Давид: потерпи Господа, и сохрани пути его, и вознесет тя, еже наследити землю, а не мози ни единаго дне оставити без пения Псалтирнаго. Аще некою нуждею оставиши, оттоле заложив, во утрие паки начни, а не престани лености ради. Глаголет бо верховный апостол Петр: един день жития нашего, яко тысяща лет, а тысяща лет, яко день един, и ничтоже в них пользует. Вся бо, братие, временна света сего, яко коло вратится. Днесь солнце, а заутра мрак, и дождь и снег: днесь пирове и браки, а заутра плач и сетование. Но аще сам подвигнешися о спасении души твоея, исправиши реченная, и научишися заповедем Божиим, и открыет очи твои, да разумееши чудеса от закона Господня.

Вопрошен бысть великий Иоанн Златоустый от братий: добро ли есть оставити Псалтирь. Он же рече: уне есть солнцу престати от течения своего, нежели оставити Псалтирь: вельми бо есть полезно, еже поучатися Псалмом, и прочитати прилежно Псалтирь. Вся бо нам книги на пользу суть, и печаль творят бесовом, но не якоже Псалтирь, да не нерадим.