...радуйся, Паисие премудре, старчества духовнаго в стране нашей возродителю

...Таковое убо основанiе, сирѣчь, нестяжанiе и послушанiе, житiю нашему имѣющу, и прочiя вся чины общежительныя, о нихже нѣсть настоящаго времене писати къ тебѣ подробнѣ, во общежительствѣ нашемъ, благодатiю Христовою, хранятся, поелику есть возможно, и нудятся братiя истинную и нелицемѣрную любовь Божiю другъ ко другу стяжати. Ибо во первыхъ возлюбивше Господа, и Его ради любве вся красная и сладкая мiра сего во уметы вмѣнивше, оставиша я, и в слѣдъ Господа своего, крестъ свой вземше, поидоша: таже и другъ друга тяготы нудятся носити, сердце и душу едину имѣти, другъ друга на добрая дѣла подвизающе, другъ друга вѣрою и любовiю ко мнѣ недостойному превзыти тщащеся, аки чада Божiя: яко мнѣ, видящу ихъ сице подвизающихся, радоватися душею, и со слезами прославляти Бога, яко сподобилъ мя Господь таковыхъ Своихъ рабовъ видѣти, и с ними жительство имѣти, и ихъ лицезрѣнiемъ тѣшатися. Якоже бо Ангеловъ Божiих зря братiй, на святое нудящихся послушанiе, недостойна себе мню ниже в слѣдъ ихъ вступити, видя себе лишенна таковыя Божiя благодати, сирѣчь, святаго послушания. И аще и не воединой суть мѣрѣ вси въ нашемъ общежительствѣ, сiе бо ниже есть вожможно: но овiи убо отъ братiи, иже суть и множайшiи, до конца свою волю и разсужденiе умертвиша, во всемъ мнѣ же и братiи повинующеся, и аки Самому Господеви, братiи во страсѣ Божiи и смиренiи мнозѣ послушанiе приносяще, претерпѣвающе безчестiе, поруганiе, укоризну и всякiй видъ искушенiя, съ толикою радостiю, яко же бы кто сподобивыйся велiя нѣкiя Божiя благодати, и сего всегда несытно желающе, всегда и непрестанно себе предъ Богомъ въ тайнѣ сердца своего укоряюще, и имуще себе малѣйша подъ всѣми и послѣднѣйша всѣхъ: овiи же суть, паки не мали числомъ, падающе и востающе, согрѣшающе и кающеся, претерпѣвающе укоризну и искушѣнiе, аще и со трудомъ, обаче нудящеся вседушнѣ первыхъ постигнути, и о семъ усерднѣ Бога моляше со слезами. Овiи же суть, не мнози числомъ, слабiи и немощнiи, аки младенцы, не могуще еще пищи твердыя прiяти, сирѣчь, укоризны и искушенiя претерпѣвати: требующiи еще млекомъ милости, человѣколюбiя и снисхожденiя немощемъ ихъ воспитоватися, дондеже въ духовный терпѣнiя прiидутъ возрастъ: единымъ благимъ произволенiемъ, и всегдашнимъ самоукоренiемъ скудость свою восполняюще. Многажды же и выше силы своея нудящеся претерпѣвати безчестiе, и волю свою оставляти, съ кровiю: сирѣчь, трудъ велiй о семъ, аки кровь, предъ Богомъ изливающе, и со слезами о еже помощи имъ Бога моляще, и таковiи же, аще же и немощнѣйшiи суть, обаче, аки нуждницы Царствiя Небеснаго, вмѣнятся пред Богомъ...

О Имени Христовѣ собраннаго братства недостойный предстоятель, Iеромонахъ Паvсiй.

1766 года, Маiа 16 числа.

Общежительная Обитель Молдовлахiйская Драгомирна.

Источник:

Житие и писания молдавского старца Паисия Величковского, с присовокуплением предисловий на книги св. Григория Синаита, Филофея Синайского, Исихия Пресвитера и Нила Сорского, сочиненных другом его и соспостником, старцем Василием Поляномерульским, о умном трезвении и молитве. – Издание Козельской Введенской Оптиной Пустыни. – Москва. Въ Университетской Типографίи, 1847. – 308 с. – Репринтное издание. – Свято-Введенская Оптина Пустынь, 2001. — С. 254-255.