Еще молимся Тебе, Человеколюбцу Спасителю нашему: едине благоутробне, едине щедре и милостиве, рабов Твоих: Блаженнейшего митрополита Онуфрия, митрополита Павла с братией Свято-Успенския Киево-Печерския лавры, архиепископа Сильвестра с учащими и учащимися, епископа Никиту и всех архипастырей, пастырей, монашествующих и мирян Украинской Церкви, в жестоком гонении от безбожных и от лжебратий сущих, избави от настоящия скорби и печали и от обдержащия их пагубы; исхити их Многоблагоутробне, вопиющих Ти, обуревания многого и лютага; претвари, Владыко, печаль и скорбь в радость о Тебе и делех Твоих, молимся Ти: услыши и помилуй.

Господи, слезы и скорбь вдовы наинской о сыне ея единороднем умершем радость воскрешением его ей даровавый, исполни веселия и радости о Бозе рабов Твоих: архипастырей, пастырей, братию Киево-Печерския лавры, монашествующих и благочестивых мирян Украинской Православной Церкви, от безбожных и лжебратий гонимых,  и яко Щедр, милостию Твоею прости им всякое согрешение вольное и невольное; утверди в вере и верности Церкви Твоей сущих в скорби и во всяком обстоянии, молимся Тебе Боже наш: скоро услыши и милостивно помилуй.

Всещедрый Господи, Иаиру печаль о дщери его умершей и сотнику скорбь о умершем отроке его на радость преложивый  воскрешением их. Ниспосли и рабом Твоим архипастырем, пастырем, братии Свято-Успенския Киево-Печерския лавры, монашествующим и благочестивым мирянам Украинской Православной Церкви, от безбожных и лжебратий жестоко гонимым, утешение посещением их Святым Твоим Духом, скорби утоли, от обстояний избави, скоро услыши нас, рабов Своих, к Тебе, источнику радости, вопиющих и милостивно помилуй.

https://t.me/HRAMVLEONOVE/1203